Geguritan

KANVAS II

yagene kanvas-kanvas ing ngarepku

kebak maneka warna gambar-gambar gegaman pathing crangap

kinarya ngilekake marus

kebak maneka warna gambar-gambar bedhil lan mimis

kanggo nguntabake playune saleksa nyawa

yagene kanvas-kanvas ing ngarepku

padha digambari mawa abange ludira

kanthi pigura bathang-bathang

GURIT

Tanganmu ukara – ukara anjawil

Lathimu wirama adreng dumeleng

Datan kapaelu !

: sepi !!

Bojonegoro, 1995*

PANDAKWA

Ah !

Apa ora rumangsa

Apa ora rinasa

Nalika driji aweh panuding marang wong liya

Papat liyane ngarah marang sapa ?

: terwaca

Bojonegoro, 1996*

AJA

Samenir kang tinampa linuwih piguna

Margane ngupadi mestuti patut datan selinthut

Snadyan kalodhangan kuwawa rinayuk ginegem

Suthik melik necep nikmating slingkuh

Yagene kowe nggembol panggantha

= mbah suasana regeng padha adreng ngupeng maneka tumpeng

+  Ya ben !

                   =   aku arep melu bancakan nyamleng

+  Aja !

Alon _ alon waton kelakon ancasing laku

Lakar lekas lalui lampu rambu

Lena lupute tumekeng lalis

Yagene kowe ajeg takon

=  mbah kae akeh dalan sudhatan gelis tekan panggonan

+  ya ben !

=  aku sigra gagancangan

+  aja !

Ajar sabar ajeg subur sempulur

Jen sumur yen wis di ulur bakal mungkur

Becik Gentur  syukur maring gusti kang mah luhur

Yagene kowe kapilaur kandha memintha

=  mbah kae akeh kan padha adeg blabar kawat

+  ya ben !

=  aku arep melu palembayan

              +  aja !

Tata titi kebsk ing pengati – ati

Snadyan wong mati datan kongsi bali

Bekti at kudu mestuti werdine ngaurip sejati

Yagene kowe lansah sanggarungi

=  mbah akeh durjana malah asrin sinabya subya

+  ya ben !

=  aku dak melu nyinamudana

+  hus ! aja !!

Psjb, 1996*

BEBADRA

Urip kaya mung siji panggonan saka maewu – ewu koplakan

Papn ngaso sauntara apa pangupaya leladi luru sesangu

Kanggo tumuju marang koplakan candhake tumekeng pungkasan

Aneng sadawane kebak sandhungan lan maneka junglangan

Asring kabentus tiba njerbabah kasulayah

Wola – wali ndadekake  kedhote tatu – tatu

Urip yayah rananggana

Prang campuh kambi pacoban lan pepalang minangka pandadaran

Sajuga kudu ngasorake mungsuh jro dhadhane sowang – sowang

Nadyan mung hawa yen manjekma kuwawa maujud raseksa

Ngaglah prakosa

Yen rupap dahana kongang ngobarake bawana

Urip bebasan wong mampir ngobe

Kleru kang dilangga bakal memendemi

Wulu lali purwa duksina kumleyang ing awang – awang

Sirna gegbengan lambaraning kayun

Nyepak – nyikut nglethak ngremus tanpa pepetung   

Bojonegoro, 1996*

GURIT KATRESNAN

Walaka aku wes jinja yayi

Yen kudu wola-wali mranata cuwilan rasa cicir

Mungkur sadawane dalan- dalan rumpil

Suthik ngenam tali rasa telenging nala

Marma kang ajeg tinemu ati cuwa

Tan kumbi aku wus kemba yayi

Yen kudu nganglang kekiter wewuyungan

Ing ndhuwur tlaga wening kekinclong

Karana asring mung fatamorgana

Memaeka pancanndriya

Walaka aku wus suthik nembang asmarandana yayi

yen tundhone ngrerujit ati

marma tinemune lumer katresnan sejati

hamung ing astane gusti kang maha suci

aja kongsi ko-tangisi dhuh yayi

yen jiwangga kiyi condong mestuti

margining leladi ing ulegan sepi

kambi njlumati lembaran lelakon kawuri

kang rojah-rajeh tumoreh tatu-tatu

Bojonegoro, 1994*

ING NGAREP LAYAR BELING

pranyata saben omah bocah-bocah padha gentur manembah

gumregah tan metung wayah

madhep tan marang Gusti kang wus akarya jagad

sumuyud gambar-gambar

kebak dzikir-dzikir maksiyat

jebul bocah-bocah tansaya taberi

nembangake lagu iklan tanpa ugeran

lan wirama-wirama lekoh cengkah norma-etika

dinulang film-film wisa

ngranuhi menden tan sinayuta

lan saiki bocah-bocah tansaya bekti

nora marang bapa biyung parandene

kanggo idhola ing kothak sinetron

kang kadhang tan slaras lan kurang santun

dhestun ginulung ulegan jaman edan

bocah-bocah wus racak pinter macak

pepaes apupur keladuk mutawatiri 

lan simbah ambegan landhung

kasunyatan kang mrucut saka kekudangan

Bojonegoro, 1996

KAKI TUWA PINGGIR TLAGA

kaki tuwa lungguh tumungkul nunjem jro tlaga, pengangen

sing dietung dudu saweneh angka-angka walaka

sing diwaca dudu ukara-ukara tinata tumata

sing diwaca lan diwilang gunggung dosa abot rinasa

sing katon nggegirisi mrangguli praupan lunges pathing caloneh

kaki tuwa gelis mlengos mangiwa, njola

nana lanang-wadon jejogedan dalan kathokan

sajuga wuru nggeguyu praupan tartamtu

sapa? yagene?

disaruwe malah kebal ngece

kaki tuwa  mlengos manengen, njomblak

bocah-bocah padha kapiadreng pancakara

silih ungkih rebut unggul nyandhung  nyrimpung rebut ngarsa

maneka panduwa datan ginape

kaki tuwa sigra tumenga nantang gegana

sing dietung dudu lintang-lintang pathing galebyar ing antariksa

sing wola-wali ditangisi dudu sitaresmi angslup ung cakrawala

sing pepetung mobah mosiking jaman kelangan keblat

sing ditangisi pisambate bumi rengka

Bojonegoro, 1995.*

ULEGAN

jumlegur ombak rasa jro dhadha

ambuncang kayun rebut kasunyatan mligi

nut ancasing laku sowang-sowang sinartan umob getih

apa wigati ditemaha sumitra?

yenta bebaya tanpa rowang sabela

luput dadi salawana

jumlegur ombak sedya nyempyok watu karang kesombongan

tumuju biru cakrawala

papan pangimpen adoh nyamut ginantha-gantha

ngerek jejeg gendera kamardikan

apa kunawa linakonan sumitra?

yen among sesangu kesaguhan

jumlegur ombak jaman

kinebur swara tekebur nyeret sangkrah dekadensi

mingkar-mingkur mobah-mosik rebut gasik

lan para jamhur siningkur mungkur

bebener gelis kaliyer

lelaku luput sinembah-sembah

malembak atun samodra rasa

biru ing panglenggana

jaman cakra manggilingan

lumepas saka pangajab lan kekudangan

Bojonegoro, 1996,*

ANTARANING BUMI LAN LANGIT

antaraning bumi gumelar lan langit manglung mentiyung

kanyatan gilir gumantine laku kahanan

tansaya cetha terwaca prabeda iklim lan mangsa

prabeda slaga-lelewa jro pangangsa-angsa

bumi lungse wus kelangan papan manekung

rebut dhucung firaun-firaun anyar katon

malang migung ngumbar dzikir sesumbar tembung

kumalungkung

antaraning tangis sesambat pathing bilulung

langit wus nora kuwawa dadi papan pengayoman

tan maelu panas kemranyas jiwa tansaya aking mranggas

dewa-dewi gegojegan suwalike kori kinunci

widodara-widodari kapiadreng lelangensari

bethara-bethari lungguh jigang ing dhuwur kursi

bumi wus nora kesdu murakabi

tetanduran iman ngrembuyung wiwit alum

rontol siji mbaka sajuga katiyup samirana wisa

garing amor jro pawuhan kebak jejember

ing tlatah cengkar ngendi kongang wiji thukul tumangkar?

lemah kadidene amanah kang ajeg kaambah

katalompen nora dikemonah  kanthi tulusing manah

kepara dikebaki bacingah-bacingah ngaglah lakuk sawiyah

apa iki tetenger tumekane adzab pasiksan

tumedhake palu kapradatan?

Bojonegoro, PSJB 1996.

PRASAPA

ombak wektu sinempyok mring gisik jaman

samodra biru malembak manjelma ulegan

giris

prau-prau gorying oling peteng lentera

sinawang garis cakrawala

jebul waktu karang

pepeling kinen bebadra nuju kasembadaning jangka

linambaran leksan pandonga

waspada

bumi panas ketiga landhung

kali kedhung asat bingung patting bilulung

godhong-godhong garing

lemah-lemah bengkah

aja kongsi aweh panuding sapa salah

jer sayekti kabeh pepeling wigatine panembah

siniram donga pamuji ngrembaka ngrembuyung

Bojonegoro, 2003

NALIKA BUMI SESAMBAT

yagene bumi bengkah moyag-mayig,

geter-pater penguripan pating bilulung kelangan paran

apa karana kapladreng ngubur jejember maksiyat leletheging jagad

nggegiri ulegan sangkrah peradaban

yayege gunung njeblug banjir bandhang ngrabasa panudungan

apa kadidene pepeling ngaurip ketungkul laku kamurkan

kadurakan datan kendhat bumi dadi memangsan

Pangeran winates jro kapitayan datan tumus ing laku panguripan

Yayege ulegan ombak gumulung nglarung jisim tanpa wilangan

apa samodra bawera murina adigang-adigung kumalungkung

 jagad sawugung nora inguri-uri mrih raharja sasama

Aja sesambat yen alam tumekang kurda

Yagene banjir lendhut lerab-lerab datan kendhat

gagar wigar maneka pambudidaya

karang padesan kerem dhuhkita during kongsi nemu pitulungan

apa kasunyatan kiyi pitukon kesrakahan tanpa wewangenan

bumi kadidene amanah wus disesawiyah

sapa kang kudu diruwat

manungsa wus kianat

sapa kang kudu dijimasi?

manungsa wus, manjelma iblis laknat

Malaikat :Iblis keparat!)

Bojonegoro, Nopember 2006

WENGI ING POJOK HALTE

o, jebule aku dudu rembulan

kang kuwawa sumunar

memadhangi wengi petengmu

lan mendung angendanu

ah!!

aku pranyata uga datan banyu

kang kuwawa anjamasi

lebu-lebu njo atimu

lan langes pathing cloneh ing sapandurat

(aku mung bisa ngedonga kapan padha mertobat

oncat papan maksiyat

Bojonegoro, 1996

Tikus lan Kucing

terwaca wu tansaya ngrebda

tikus-tikus lemu wulu-wulu alus

blusak-blusuk malbeng pedaringan

gawe maneka bolongan

sliman-slumun munggah mudhun lemari makan

sesingi lan nyolong pindhang

wola-wali asring disaruwe

datan kapaelu!

nalika teka kucing mawa untu-untu lincip

cakar-cakar landhep

ngoyak tikus nedya dikremus gusis

jebul mung padha laku sandiwara walaka

gandheng kunca kebak petungan

banjur adreng banjakan

Bojonegoro, 1996

RERONCEN PANDONGA

tan kemba dak jumputi cuwilan crita kawuri

kang asring kajuwing-juwing pating slebar

kang ajeg tiba kebanting jro baita gonjing

oling

dak tawa mawa pulut panglenggana

sandhuwure lembar-lembar anyar

kinen aweh piguna sadawaning laku bebadra

muga-muga,

dak jumputi cuwilan crita cicir

nalika niba tangi nepusi dalan-dalan rumpil

tinata jroning pigura cumanthel

mbok menawa bisa cumithak gambar-gambar anyar

tumrap sedya makantar

muga-muga,

dak jumputi cuwilan crita kepungkur ndungkap kinubur

dak ronce wujud tasbih dzikir

dadi paseksen tumorehing kodrat

ing sajadah pasujudan

kang dak jamasi eluh bening dedleweran

Bojonegoro, 1997

Ajar Sabar

ajar sabar marang jembar segara

datan suwala nampa sangkrah kumrembyah

ikhlas gumbira mapag ombak anjambak

setya angrantu prau-prau lelayaran

asung pandonga marang manuk-manuk mabur

ajeg angreksa watu karang lan

panguripan ing teleng samodra

ajar sabar marang srengenge

tansah sumambirat ing imbang wetan

aweh pepadhang jagad lan napas panguripan

tumekeng bebrayan wanci gilir gumanti

ajar sabar marang bumi

ajeg kaidak wola-wali

dadi palagan papan pasulyan

laku wengis kanisthan kadurakan

uga dadi pakuburan maneka jejember

parandene datan sambat

nora ngrantu pangalembana sanadyan tansah disawiyah

banyu-banyu terus mili murakabi

tetanduran ajeg subur ngrembaka

ajar sabar abang-biru kasunyatan

ajar sabar pacoban lan kanugrahan

samubarang kawicaksanan

pawehing Gusti Kang Maha Wikan

Bojonegoro, 2003

Pawarta Saka Pangumbaran

Apuranen aku,

wus sewindu lawase nuruti ati kumbara

ninggal sliramu kanthi ati tatu

jumangkah luru margining kamulyan

apuranen aku

lunga ninggal sawah pategalan

jer wus ora kuwawa dadi sumber panguripan

aku uga wus krungu saka kadohan

ana rame-rame owah-owahan kahanan

reregan rabuk lan obat uber-uberan

nora murwat kambi ajining kringet dleweran

apuranen aku,

wus sewindu ora aweh kabar

tartamtu bocah-bocah angrantu kanthi kuciwa

layangmu pungkasan wus dak tampa

ngenani bocah-bocah wus ninggal bangku sekolah

temen apuranen aku,

ora bisa bali mulih ngadesa

nalika ibu seda

aku kesrimpung ing kantor imigrasi

ora ngerti iki laku bebadra apa laku pidana

iki pangumbaran apa sajjroning bui?

Bojonegoro, 2003

MARANG KANCAKU

Banyu,

saiba mulyane saumpama manungsa nulad kartimu

saka pucuk lan lengkehing gunung

tansah tumuju tataran ngisor

warata ing biru samodra

gumelar tanpa winates

kinuras tan bakal asat

darmamu mring sasama

masuh ing sawarna rereged

paring ngombe marang kang ngelak

paring udan marang wit-wit aking

nelesi lemah-lemah garing

lakonmu kebak pandadaran

mili nurut kali nasak alas milang karang padesan

mangkono terus tumeka sungapan

Banyu,

yagene banjur ngatonake kaprakosanmu

gumulung ombak nggegirisi

ngrabasane banjir bandhang

akeh tangis tawang-tawang

rekasane urip tamba panandhang

Baureno Bjn. 1993

ING NGAREP KORIDOR

wengakna !

wengakna !

wengakna !

wengakna sing amba kareben

kabeh cetha lan terwaca

(: clathune cah cemlewo ngrudha peksa !)

aja, ya, cah bagus!

mengko simbah masuk angin

ing mburimu akeh duratmaka sinamudana

akeh bekasakan sluman-slumun blusak-blusuk

kowe kena lumebu nadyan mung samadya

(: pangrimuke wong aris ing melu trunyuh)

datan nglenggana malah dadi gendra

swara santak gelis dibungkem

tangan-tangan kablenggu

bocah-bocah cumlewo mlebu senthong

siji mbaka siji

sepa-sepi

sepi!

Bojonegoro, 1994

TINARBUKA

swara gendhing nganyut-anyut

mahanani swasana

wiwit poncot tumeka praja

ngusadani wuru ratu

nadyan sayekti mendhem dahuru

kang during kawetu

wirana gendhing nganyut-anyut dawa

amblenggu dhadha

jiniwit rasa yekti ana

pancakara

antaraning blaka lan samudana

najur kajiwit swara blero

kasunyatan kang datan kinira

dhog ! dhog ! dhog !

dhalang nyempala kothak

gendhing banjur suwuk

rianyuk 1 rinayuk1

tinutup rapet

pet !

Baureno Bojonegoro 1993

PITAKON

jajal apa bedane manungsa lam macan

yen padha-padha seneng nglethaki balung

ngremusi bathang-bathang

apa bedane kamibi tikus

yen padha-padha saba sawah lan pedaringan

padha-padha seneng nguras beras

coba apa bedane manungsa lan buta

yen padha-padha kolu nglangga ludira

tegel njegal sapadha-padha

apa bedane karo kebo lan sapi

yen padha-padha asesantri urip kanggo mangan

datan mangan kanggo urip

banjur apa bedane manungsa lan jaran

yen padha-padha seneng ora kathokan

Gg. Mujahidin Padangan Bjn. 1994

MARANG SIMBAH

gelis tepungna aku kambi watu karang kae simbah

kang tansah kukuh bakuh tumancep

wola-wali kasempyok ombak-ombak anjambak

mawantu-wantu tinempuh angin-angin prakosa

samadyaning samodra tanpa winates

gelis tepungna aku kambi segara biru kae simbah

kang jembar anteng antaraning langit tumiyung

malembah-lembah tumeka garis cakrawala

tartamtu jero dalan buthek nadyan kinebur

mokal asat nadyan kinuras

gelis tepungna aku kambi rembulan purnamasidi kae simbah

tansah tresna sumunar ing langit lazuardi

terus lumaku antaraning mega-mega akasa

minangka lentera bebadra

gelis tepungna aku kambi etharakala sinamudana kae simbah

kang cluthak asring ngletak lan nglangga ludira

kang ngaglah ing ngendi-endi papan panggonan

dak nyodba aweh panantang nadyan kasunyatan

kapracondhang

gelis wulangana aku simbah

kapan nangis

kapan gumuyu kapan nangis lan gumuyu

Baureno-Bojonegoro 1995

ING SARASEHAN

prayogane gelis anggelar klasa lungguh sila

ngrembug eksistensi wigati

mbirat panyakrabawa sanggarunggi sayekti

datan nana kang linuwih piguna sajuga lan sawiji

rekta seta, langking jenar kabeh kebak ing gati

nut papaning sowang-sowang

prayogane gelis anggelar klasa lungguh sila

bawarasa sutresna umiring manunggaling panglenggana

kareben hora nana salawana keladuke

agawe gendra lan pancakara

prayogane gelis anggelar klasa lunggih sila

madhakake swara-swara mblero kawistara beda

kareben dadi wirama warata tinata

nganyut-anyut rinunggu ajeg ing sawerna swasana

GENDERA

Sinawang kumlebat gendera jenar

katiyup samirana manda sumilir

ngrantu tumekane kasunyatan anyar

esem samenir

srengenge anyar gelis sumunar

(eman: ontran-ontran owah-owahan bebrayan ngunduh kasangsaran)

sinubya-subya kumlebat gendera ijo

mangsakala saben cangkem pinter maido

ulegan padudon saenggon-enggon

silih ungkih dedreg udreg arebut bebener

keblinger keblat wus minger

(eman: kamardikan tanpa winates kang micana geni lan gaman)

titi wanci kumlebat gendera  abang

tekane kinurmatan kadidene duta menangako patembayan

ngumbar panacad piala mangsa kawuri

nebah dhadha sinambi pratela jejer wong suci

enggal nata petungan milang panduman

(eman: jas bukak iket blangkon, sama jugak sami  mawon)

kudune nglenggana banjur ngerek gendera seta

jer bebrayan wus koncatan rasa-pangrasa

tan kongang suwala ngaurip abot rekasa

terwaca kabeh kasinungan watak duratmaka

(gamblang: kita wus kapracondhang)

Bojonegoro, 2003

DHALANG

suluk ngaluk-aluk

ngrakit sajuga jejanturan

nata bebarisan adhep-adhepan

gendra ontran-ontran

geni mangalad

perang campuh nora pilih mungsuh

kadang rowang dadi bathang

wayang pating slengkrah ing pakeliran

tembang tangis keprungu nggegirisi

kang nyawang padha mbrebes mili

dhalang tumbak cucukan

tinggal glanggang sesingidan

pagelaran tanpa rasa kamanungsan

Bojonegoro 2002

HOREG

gendera candra geni wus kamublat

rangganana agenda murus

kreta perang pinanjang

gendewa sawega pinenthang

bragada pacak baris ngransang ngmbah palangan

sumpah supata amor sesumbar mciya-ciya

ngrengkebi bumi kinasih

tetumbal kuntahing ludir oncating nyawa

banjur jro bumi kamrdikan kiyi

yagene ketungkul pancakara ameng-ameng nyawa

mestuti lekas laku watak satriya?

apa gumun ngumbar angkara murka?

nelangsa pisambate bumi rengka

Bojonegoro, 1995*

ING NJERO PIGURA PANGIMPEN

sing adoh dudu jangkahe

nanging tekade

sing jembar dudu lelungguhe

pangapurane

sing lumer dudu tangane

sing katresnane

sing sulistyadudu praupane

pakartine

sing nduwur dudu dedg piadege

gegayuhane

sing putih dudu pakulitane

suci atine

wolawali dak ranggeh

dak rengkuh

mung gambar- bambar ing panganggen

MARANG BAPAK LAN SIMBAH

gelis tutup mripat kiyi

kareban nora meruhi simbah ngatuk iang kursi empuk

datan kuwawa nyawang tangis pathing bilulung

nalika papan kiyi wus ginawe lurung lan gedhung-gedhung

gelis bungkem cangkem kiyi

kareben nura kuwawa maneh nyawa santak

wirama-wirama mblera nyogroki kuping

nalika wus akeh duratmaka sinamudana

blusak-blusuk sluman-slumun mamaeka

gelis blenggu tangan kiyi

kareben nora saguh ngacungake kepelan

nalika wus akeh kang padha kesimpar kesandhung

kaprawasa pangrekadeya

jugar wigar luru jaitning kaadilan

gelis srimpung sikil kiyi

kareban nora nylentik ambalela

nalika kepidak sepatu-sepatu prakasa

banjur swasana gwanti sepi sepa

gelis lungguhe ing kursi pradata

temahan malbeng kukuhe wesi pakunjaran

kareben bapak lan simbah mardika jejogetan

ing madyaning tangis tawang-tawang

Bojnegoro, 1995*

PRAUPAN-PRAUPAN AENG DINO IKI

aneh??! ora!

pancen jaman wus lageyan

mangsa gumanti slaga

durjana sinubya-subya kadidene pahlawan

menangake patembayan

aeng??! ora!

ngaurip wus omah gingsir

akeh praupan-praupan pathing cloneh

ireng  janes

bisa dipupur

aneh?? ora!!!

jamn wus wiwit kelangan keblat

duratmaka timpal olah sesingidan

suwalike topeng-topeng kemunafikan

samar sinamun

aneh? ora!

jamn kaliyer duwike wong slingkuh

nggengi papan-papan lungguh

lan meja kursi kebak ndluwangsolusi

samburine

kuri kinunci

lumrah? embuh!!

jaman tansaya kaseser ulegan

simbah sengkud gawe ngengrengan mirunggan

bocah-bocah kudu nglenggana dadi reca

dina-dina ngitung kasunyatan ngrerujit ati

gilir gumanti

Bojonegoro, 1996

erang Kang Sejati

perang ing ulegan jaman kang wus ningga laku memitran

uga datan ngungalake kasudibyan priyangga

suprandene kang sayekti kuwawa meper napsu suthik marang laku dudu

perang ing bebrayan yayah magut rananggana bawera

nora ngerigage wadya bala sepirang-pirang bregada

uga datan bleger pideksa gagah prakosa 

marma kang wigati tansah mestuti laku kadarman

nut ugeran jro dhadhane sowang-sowang

perang ing ngaurip werit kelangan keblat

nora ulah paekan arebut kalodhangan

jer iki papan patembayan sumawana pandadaran

kridane satriatama kang dinuta ngemban sesanggeman

memayu rahayune bawana

Bojonegoro, 1996*

 Swara-Swara Jangkrik

nadyan wiwitane mung pathing gremet-gremet mumet

luru kamardikan nywamake lagu-lagu kadilan

nalika tangan-tangan prakosa ajeg ngrudapeksa

terus pathing klesik wiwit adreng rembungan

kambi kunci ………………… gangsar lakuning kekarepan

ngrebut kalodhangan

wengi iki jangkrik-jangkrik wiwit mekrok elare

pathing pletik gelis ngerik elik-elik

ngunggah sing lagi angler turu ing nduwur kursi

kareben ngrungu swara-swara panduwa

swara-swara tangis lan sesambat tan kendhat

rikala ngerik bebarenagn gunarudug bebarisan

swarane nyogrok kuping nggeterake dhadha kuwawa

ngrebut kawigatan

banjur sepi Nalika tumekane tapak sepatu midak rosa

pathing bleber pathing bilulung

padha mlayu sesimgidan luru keslametan sowang-sowang

Baureno Bojonegoro, 1995*

WATU

anamu atos pathing pendhosol pengkuh dadi pawekuh

ing dalan minangka sandhungan ing samodra njelma watu karang

wola-wali sinempyok ombak walah landhep nggegirisi

apa sejatine kang lagi ko paragani ing bebadra iki

playumu ing kutha dadi tetanduran gedhung sundhul ngawiyat

ngliyer omah-omah cilik nganggo buldoser dadi tangis

dadi pasulanan rebut panduman kanthi kolusi lan

maneka paekan uga kemunafikan

anamu ing jro dhadha dadi ati lan rasa pangrasa dadi atos

wengis mentalan nggiles semut-semut ing poncot gang

watu-watu gudras getih abang amelereh

apa kuwawa dadi tumbal wadal raharjining sasama

apa malah dadi margining kadurakan

Bojonegoro, 1995

          Sawijining Pitakon

tengah ratri sitaresmi wus adoh gumlewang

banjur ngilir ngusir piker marang sekalir

ketanggar sesanggan sumampir abot yayah tiniban wukir

ing ngaurip gilir gumanthi tumorehe pepesthi

yagene kowe isih during damang anakku

pitakonmu terus ndalidir

tengah wengi kontal ing pesisir sepi

banjur kentir sewu pamikir rinasa ana kang cicir

sadurunge prau budhal nempuh samudra bawera wus dak jawara

yen kudu sawega nampa kasunyatan

yagene kowe ajeg aweh pitakon ing ngendi dununge pelabuhan pungkasan papane kamulyan

lingsir wengi ngilir ing cakrawala sepi

rinasa angin kulon nyempyok asking kalbu

gurewalan tinendhang bal globalisasi kudune puguh mikukuhi

yagene kowe isih adreng aweh pitakon anakku

melu oyak-oyakan mbujung wewayangan

bapak ora bisa wangsulan

tengah wengi keli ing ombak samudra sepi

becik asung pamuji marang gusti

karebe urip rineggeng arti

nemu werdine bebadra sejati

Bojonegoro, 1996

   PROSESI

hana praupan-praupan suntrut

sineling tangis layung-layung anjejuwing ati

jasad kaku lumebhu kreta tanpa rodha

banjur kairing swara-swara pandonga

ngutabake laku bebadra ing papan liya

lan udan riwis-riwis asung pangubagya

bebarisan dawa tutwuri kreta

kadya ngirid duta menangake patembayan

luwar sak papan pauslayan kebak kaculikan kawengisan

ngerek gendera kamenangan

ananging yagene akeh tangis sesengrukan

testing waspa kacuwan sauruting dalan

tumuju koplakan pungkasan

ngetung angka-angka bebana lan paukuman

jejeging pradatan sejati

Bojonegoro, 1996*

WUS NDHUNGKAP SURUP

mranggas

gegodhongan wus grogog rontog

bun-bun esuk kelangan papan pinencokan

semut sebangsane koncatan pengayoman

sekawit wus tan damang ancasing memitran

nggegegi sedyaning sowang-sowang

kali asat blumbang garing

tetuwuhan angking antaraning tetanduran gedhung

sundhul wiyati

bumi rengka geter pater

kinemotan maneka rupa maksiyat

jagat kelangan keblat

bumi samar datan terwaca

gelis peteng

tan prabeda rekta apa seta

bener apa luput tan kawistra

1996

MARANG LAKI BABADRA

nadyan wola-wali ati keji jero ulegan lekas kebak angkas

dalanan rasa dedreg udreg laku pangangsa arebut mangsa

yekti isih wigati tansah disranteni mawa tali kendhali

marwa kamardikaning jiwangga prabeda kambi sato kang cengkah mring subasita

urip kanggo mangan datan mangan kanggo urip

nadyan mripat kinarya mulat mobah mosiking kanyatan

dalasan panuntun sakabehing tandang grayang

suprandene kudu tinuntun mripat kang sajuga yeku

maniking kalbu pandam pandoming laku

jro ngaurip kang tanasaya amblerengi

nadyan suku kanggo lumaku tumuju ancasing sedya

dalasan srana panyengkuyung kasembading ati kumbara

parandene kudu kakanthi teteken kareben tekan

mestuti linambaran dhawuh pangeran kang tamtu datan samar

mokal kalamun dudu lan sasar

nadyan urip ngrantu tekane pepesthi

dalasan nampa kasunyatan tumorehing kodrat

ojo kongsi hamung tumancep pasrah nora jumangkah

jer gusti Kang Akarya jagat nora ngowahi nasib sawiji titah

kalamun datan priyangga kang adreng ambudidaya

Bojonegoro, 1996

SAPA KANDHA

sapa kandha aku bacingah

ajeg ngaglah

ngrayuk ngrayah sega bancaan

kang adreng dadi rebutan

sapa kandha aku tikus

blusak-blusuk menyang pedaringan

munggah-mudun meja makan

nggeondhol dhendheng lan pindhang

sawangen kang terwaca

aja kongsi gampang aweh pandakwa

aku mung semut gumremet

luru sisa upa bancaan

ajeg kapidak ing ngisor dlamakan

Bojonegoro, 1997

BENER KANDHAMU

baner kandhamu sumitra

kita mung kuwawa ngenam sedya panjangmu

makaten ing jagut gumelar

jebul asring gagar wigar

kinacek kambi kasunyatan

kang wus tumoreh dening Kang Maha Wikan

bener kandhamu sumitra

kita mung kadidene paraga wayang ing pakeliran

datan kuwawa suwala marang apa karepe dhalang

menang apa kapracundhang ing rananggana

kita nora duweni purba wasesa

Bojonegoro, 1997

Banyu Kali

aja ndadak ngimpi kasunyatan bali mrangguli

swara-swara kumerisik harmoni alam ajeg gawe kangungunan

nelesi lemah-lemah garing uga miring pakulitane prawan padesan

ciciblon gegojegan mardika

aja ndadak ngumbar pangangen kapang marang alam kang sumadulu

kabeh padha nggegegi penemune sowang-sowang nora mawang

tegese kekadangan

datan prabeda kambi kali kang ndhisek mili sajroning ati

ajeg wening tumuju samodra iman tanpa wewangenan

saiki wus garing kesawaban geni kawengisan

 kebak langes ireng njanges

Bojonegoro, 199

PANGLENGGANA

apa kang isih digagas kaangkas-angkas

jer kalamun winawas kanthi menebing tyas

laku-laka bisane kasembadan hamung kerana palilah

Gusti Kang Maha Wikan

pangupaya mungguh jinagkung ancas

becka samadya slaras kambi kesaguhan kang sinandhang

tan winates mring gebyar panyawang satleraman wakala

lan wigati kayati wewangson

mangan kanggo urip dudu urip kanggo mangan

Lamongan

REUNI

Rinasa nembe mecaki dalan-dalan pangimpen rikala tanpa kangsen mrangguli kanca lawas nunggal ancas lan lelabuhan duk ngrungkebi susastra kadidene warisan. Kadang Yusuf Susilo Hartono kang lawas blusukan metropolitan kadingaren mulih ngadesa nyangking laptop kebak naskah geguritan, edan tenan.

Banjur makantar-kantar mili crita sedhihe ngenani budaya-sastra jawa kawuri ing tanah kelairane, madeg-ambruke sanggar, laying kabar gulung tikar, seminar sastra gagarwigar bupati ora lejar. Dawa-dawa ula critane ngalor-ngidul nggepok senggol sastrawan jawa kang seneng regejegan, tumlonjonge dudutan mbiji yen sastra jawa ramene mung ing konggres lan sarasehan.

Rinasa nembe lelangen sajroning alam ilahi nalika Djajus Pete andim imajinasi marang kadang-kadang nunggal diskusi mirunggan tumuju marang kadang kaneman Marma lawas sawuse nampa pangaji-aji gelis silem sajroning jaladini apa teteki ing pucuk gunung inspirasi kareben kuwawa mbabar karya sastra ngedab-edabi. Nyatane ndhungkap limang taun repritane ora njedhul ing ombaking kalawarti, ora katon kumlebat ing santering angin pirembugan mirunggan.

Rinasa iki lelakon sajroning turu kepati nalika kasdu sapejagong kambi mbah Makloem kang mbiyen remen ngripta puisi ngenani donyane prostuti, tumekeng paripurna  ngayahi dadi pegawe negeri geguritane during ngancik skeet iji kang kapacak ing kalawarti. Sanadyan datan pujangga, nora baud orasi landhepe gaman argumentasi ing meja diskusi, suprandene panjurung, pangupaya, panglipur tumekeng labuh-labet arsa ngrungkebi warisan aji nganti nafas pungkasan pantes kinarya tepa-palupi.

Ana rasa rangu-rangu pangimpen apa kasunyatan? Kasunyatan apa mung halusinasi? Arikala kang Hoery kirim es-em-es asung kabar nyalawadi kang agawe bungahing ati dhimas, ariadi iki kadang-kadang mbabar antologi kadidene pandonga marang para suhadak sastrawan jawi kang wus surud ing kasedan jati. Pitakonku mburu mantebing ati. “Kang Mas, kadang-kadang padha teka nyawiji apa mung ndedonga kanthi kirim puisi?”

“Aja sanggarunggi, kadang-jadang manunggal ndedonga njamasi warisan aji”.

PSJB, 2006

SAPUNGKURE PAGELARAN

(ing papan njaba)

sekawit gumremeng sapadha rowang sinambi jejagongan

perembugan gelis dadi ulegan

banjur asung sasmita

banjur geseh panemu

banjur aweh panduwa panuding manekawarna

banjur silih ungkih adu wacana temahan

padudon regejegan tanpa tanja

dedreg udreg arebut bebener tanpa ugeran

(ing njero)

pagelaran diwiwiti rinengga edi-peni

diskusi giganas lan diangkas-angkas

sineling guyu gumerah mbabar argumentasi

sengsem

sarwendah yayah hapsari

golong-gilig sarju ngundha sitaresmi lan

ngupadi tirta perwitasari

kinarya ngrembaka susastra

(saiki)

dluwang lan meja-kursi wus diringkesi

poncot-poncot pirembugan suwung

swara-swara mblero  njaba sirep sepi

paraga-paraga kang adreng ngerek obsesi

gelis turu nglepus mecaki leksan pangimpi

tumekeng pagelaran candhake

ngerti-ngerti kang dirembug wus dadi layatan

PSJB 2006

LELAKON

krenah ngurug wewadi tembung lelamisan

tinableg leksan paekan sinamun

jero kinubur

tetela badheg batahang warata

kawiyak angin jaman

kanyatan wektu wicara wakala

solah culika

winungkus kain sutra

tembung manis memanuhara

gelis binirat swasana

pilah-pilah pinilih

becik-piala kawistara

trekah srakah ngrayuk ngrayah

siningid jro

skenario sinetron muyeg panguripan

rinenggan episode mirunggan

pantog crita kejodheran

sadurunge tumekeng paripurna

PSSJB, 2006

NGAURIP KUWI

ngaurip kuwi langit lazuardi sinawang saka kadohan

biri endah mega-mega anglelewa

tumiyup angin arak-arakan ngengiwi-iwi

sengsem pandulu kapiadreng ngetut laku

rinasa cedhak ginayuh datan kuwawa

nglari kekerepan kang tanpa wewangenan

ngaurip kuwi samodra sinawang saka kadohan

bawera biru tumekeng cakrawala

edi-endah pulo katentreman

cecedhakan kebak watu-watu karang

ngeremake gumulung nguntal memangsan

jembaring pengarep-arep jro pandadaran

ngaurip kuwi fatamorgana sinawang saka kadohan

kawuryan alun malembak

mangu-mangu leren apa terus lumaku

sanggarunggi mecaki dina-dina

mutawatiri yen kongsi jugar-wigar

linakonan akeh dalan bebadra nggayuh kasunyatan

ngaurip kuwi gunung sinawang saka kadohan

sinaput mega maya-maya kawistara

biru endah nyimpen katenterman

cecedhakan watu curing jurang trebis

alas gung ri bebondhotan

dhuwur gegayuhan tumangsang pengangen-angen

PSJB, 2006

KASUNYATAN

kae swara gumerah bocah-bocah wayah budal sekolah

katon bungah sanadyan luru papan pamulangan linuwih susah

tetela sesanggan abot kang rinasa

nggrantes ing ngomah wong tuwa nandhang dhuhkita

luru sesangu datan winates tas lan buku kewala

jer kursi lan bangku kudu tinuku kanthi regan tartamtu

yen kepingin bisa sempulur sinau

Gusti? Nyuwun sabiyantu

kae para kadang tani esuk-sore budhal nggarap sawah

ora pepetung reregan obat rabuk ajeg dikerek munggah

datan maelu kahanan semangat urip adreng gumregah

wanci panen tetela tan ngindit bebungah

senadyan tandur-tandur wus dadi gabah

sembulih kang giwana mulh tekan ngomah

datan samurwat kambi akehe kringet kang kutah

Gusti? Namung panjenengan ingkang Maha Mirah

kae prawan-jejaka ndalidir budhal ngumbara menyang kutha

ngudal leksan impen nggelar sewu sedya cedhak jurang pawuhan

pranyata prabeda antaraning kasunyatan lan panjaka terwaca

mrangguli wengis bebrayan gagar wigar ati cabar

nglenggana kaendahan kae winates fatamorgana bebrayan

nora aeng prawan-jejaka malbeng ulegan udhu ajining dhiri

ingering urip-panguripan wus linabur dosa lan kanisthan

Gusti? nyuwun pangayoman

kae bapak ingkang minulya padha gumuyu ngagem jas rinengga dhasi

ngadhep meja lungguh empuk kursi sinambi gegojegan dhiskusi

api-api ngusung janji nggawa maneka aspirasi rame adu argumentasi

kapiadreng mbengkas skandhal mbrasta kolusi-korupsi

jebul kita mung nyawang atraksi lelucon kang njejuwing ati

tanah wutah yayah hibahe simbah digadhe ing njaban rangkah

watak srakah pathing grayah istingarah

Gusti nyebar musibah

kae ratu kang sinubya-subya ujare arsa ngliyer taman sriwedari

ngluwari dhuhkitaning ibu pertiwi gumanti bebrayan endah asri

mrangguli ngaurip adil makmur gemahripah lohjinawi

wong cilik kasdu gumuyu rina pantaraning ratri

jebul kasunyatan linuwih sangsara tinimbang wingi

ratune lali ketungkul kanikmatan panguwasa kang adreng digondheli

Dhuh, Gusti Ratuning jagat gumelar sayekti tresnaMu kang dak anti

Bojonegoro, 2007

 

KURSI KENCANA

sinawang mencorong amblerengi

arebut kawigaten ngenam leksan pangimpen

gelis obah tangan-tangan prakosa

sawiji prajanji amestuti lelabuh Ibu Pertiwi

sajuga agung biwara yen pranyata isih kuwawa

saweneh mligi karana adreng ulegan kesumat

lan maneka paraga kanthi ancas kang prabeda

palungguhan mirunggan

kadidene sarana nggayuh ancas tujuwan arikala

linungguhan dening duta saraya pinilih

kasdu murakabi makna bebrayan

tumekane kahanan kang tumlonjong mring rasa kekadangan

pinayungan kawicaksanan rinenggan katentreman

aja kongsi katalompen mring kaprayitnan jer kasunyatan

tetela palungguhan dadi undering pasulyanan

congkrah dedreg-udreg silih-ungkih

ngepel tangan ngacungake landhep gegaman

arebut bebener tanpa pungkasan

getih abang kutah balambangan

pralambang sirnane rasa kamanungsan

(Palungguhan kang sayekti kagungane Gusri Kang Maha Wikan)

Bojonegoro, 2007

TAMU-TAMU NYALAWADI

iki omah peparinge simbah dinulu sarwendah

tilas bebadra kebak enggak-enggoking sejarahngaurip sinartan

wewarah pepeling kadidene amanah

yen papan kiyi kinen ginawe aweh panggulawenthah warga sagotrah

amestuti wigatining panembah

sumarah ngadhepi abang-birune urip kang wus tumoreh ginaris

kareben kasdu nggayuh tataran bale wisma sakinah

kapiadreng ngluhurake amanah simbah lawang omah gelis meneb dak kunci

tanpa kinawruhan sangkan paran jogan dadi papan nggelar kuis lan ngabotohan

pathing cruwet swara bakul permen, mi, sampo, nganti obat-obatan

ketungkul tawa janji lelamisan kanthi tembung paekan

lawang wus dak kunci

tanpa rinungu uluk salam ing njero wus akeh wong padudon regejegan ing meja diskusi

ing kursi pradatan

rebut bener adu julig ngaku pinter nadyan sejatine padha keblinger

cendhela wus tak tutup rapet

tanpa cecala ndadak ing njero wus kebak maneka pawarta sadis

kadurakan pangrudapeksa paten-pinaten kang tragis

samar lamun bocah-bocah gelis latah koncatan rasa kamanungsan

eman

kamar-kamar wus dak kunci paripaksa

isih klebon wadon-wadon wuda nglegena

tawa wentis tumekeng dhadha nggugah nepsu birahi

sapa kuwawa lumawan panggodha kliwat taker?

cendhela wus dak tutup rapet koro wus dak kunci

yagene prastawa aeng isih dak prangguli?

Dheweke lumebu liwat ngendi?

: televise !

Bojonegoro, 2007

  

DAK ULUNGAKE KEMBANG EDELWEIS

(Kanggo Siti Nurhayati)

dak ulungake satekem kembang edelweiss

wenehana kalodhangan ing poncot senthong

kadidene eden-eden pepasren

datan aking arebut swasana

aja kongsi sanggarunggi

lamun suwalike linabur wisa

dak ulungake gurit katresnan ing prenthul edelweiss

sawangen kanthi wening pangrasa

wacanen lungiding pralampita

wangsulana kanthi terwaca

yen nana werdining sasmita

dak ulungake kidung katresnan ing obahing satekem edelweiss

rinunggu kanthi weninging kalbu

kinen kasdu binuka korining asmara sinandi

kang ajeg rapet kinunci

tan maelu sewu prasapa

kok ulungake tangan alusmu kanthi sewu sasmita

edhum netramu

sinungging esem ngujiwat

banjur bebisik ing talinganku

: Mas rilakna aku lunga

Padangan, 2008

PRASAPA

ombak wektu sinempyok mring gisik jaman

samodra biru malembak manjelma ulegan

giris

prau-prau gonjing oling peteng lentera

sinawang garis cakrawala

jebul watu karang

pepeling kinen bebadra nuju kasembadaning jangka

linambaran leksan pandonga

waspada

bumi panas ketiga landhung

kali kedhung asat bingung pathing bilulung

godhong-godhong garing

lemah-lemah bengkah

aja kongsi aweh panuding sapa salah

jer sayekti kabeh pepeling wigatine panembah

siniram donga pamujingrembaka ngrembuyung

Bojonegoro, 2008

ING NGENDI PEPADHANG

leksan obor wus kekencar

yagene laku isih ajeg sasar

sunar lentera rinengga

ing bamodra bawera

yagene isih kurang terwaca

lintang rembulan asok cahyo pepadhang

biru langit lazuardi

yagene isih keblasuk jro jurang kanisthan

(Jer datan peteng jagat gumelar kadidene jalaran

ati peteng lelimengan tan sumunar

nadyan kakanthi obor sewu

yen ngaurip koncatan iman)

Bojonegoro, 2008

SESANGU

lan,

iki pedhang ligan

kadidene gegaman

ssangune anak lanang

mapag (?)

ngadhepi jaman edan

nora edan  datan keduman

lan,

iki pustaka suci Al-Qur’an

kadidene tuntutan

sesangune anak wadon

mapag (?)

ngadhepi jaman edan

nalika akeh prawan nora kathokan

lan,

iki reroncen tasbih

sesangu wadul Gusti Kang Welas Asih

lembar sajadah

papan manekung manembah

wadhah tetes waspa kutah

tumanja umur laku bebadra wus sayah

pasrah sumarah

sangkan paran

manungsa mesthi tinimbalan

Bojonegoro, 2008

POLIGAMI

datan winates kumbang pepencokan

kembang sajuga marang kembang liyane

tumiyupe angina gedhe

dadi ulegan panyakrabawa

Bojonegoro, 2008

GOSIP

mili tembung-tembung ngayawara

kali marang samodra

ombak gedhe asung pandakwa

Bojonegoro, 2008

GENDERA

sinawang kumlebat gendera jenar

katiyp samirana manda sumilir

ngrantu tumekane kasunyatan anyar

esem samenir

srengenge anyar gelis sumunar

(eman : ontran-ontran owah-owahan bebrayan ngundhuh kasangsaran)

sinubya-subya kumlebat gendra ijo

mangsakala saben cangkem pinter maido

ulegan padudon saenggon-enggon

silih ungkih dedreg udreg arebut bebener

keblinger keblat wus minger

(eman:kamardikan tanpa winates kang micana geni lan gaman)

titi wanci kumlebat gendera abang

tekane kinurmatan kadidene duta menangake patembayan

ngumbar panacad piala mangsa kawuri

nebah dhadha sinambi pratela jejer wong suci

enggal nata petungan milang panduman

(eman : jas bukak iket blangkon, sama jugak sami mawon)

kudune nglenggana banjur ngerek gendera seta

jer bebrayan wus koncatan rasa-pangrasa

tan kongan wus suwala ngaurip abot rekasa

terwaca kabeh kasinungan watak duratmaka

(gamblang : kita wus kapracondhang)

Bojonegoro, 2009

PIWULANG

Sing teguh

bebadra jro ulegan samudra bebrayan tanpa wewangenan

ajar sabar kandhang langit kumampul ing ombak malembak

kekancan lintang ing tawang

wengis watu-watu karang panguripan

tanpa lentera lan dammar pandam pandoming dalan

tumuju horizon pangumbaran adoh sinawang

Sing puguh

gegondhelan obek lan layar

aja kongsi kapiadreng manut paraning camar kekiter kamardhikan

tumlawung nggagas endahing sitaresmi sing ngiwi-iwi

tan piguna nggembol sanggarunggi rikala ombak anjambak nggegirisi

prau gonjing-oling

jer ngaurip pancen kebak pepalang lan pacoban

nora suwala kabeh kudu linakon

aja keguh

tetembanangan ngrejurit tangis tawang-tawang

annggetuni dina-dina kawuri lembar kacintrakan

ngaurip kuwi laju prau maju katiyup samirana

mapag srengenge anyar padhang tetrawangan

alam prasapa kanthi pamuji ngrasuk katentreman

sihing Gusti tumrap titah sing legawa nampa kasunyatan

Bojonegoro, 2009

KEBAT

kebat kliwat

manungsa jumangkah kanthi adreng syahwat

age-age lakune kemput jagad

nora keblat

ngangsa-angsa

manungsa kapiadreng ngeloni bawana

ngecakake leksan paeka

kareben sembada kang jinangka

ora kawilang gunggunge dosa

kebat tobat

manungasa bakla dilaknat

aja nyoba semaya malaikat

ala-becik wis cinathet datan kliwat

petungan ngalam akhirat

Bojonegoro, 2009

TIKUS-TIKUS ING OMAH ANYAR KUWI

senthong omah lawas ninggal crita klawu

tikus-tikus wirog saba lumbung pari gelis lemu

digropyokrame-rame tinggal glanggang colong playu

sesingidan ngupaya rahayu tikus-tikus salin wulu

terus dibledig dadi bebandan

siji mbaka sajuga malbeng krangkeng pradatan

senthong omah anyar diwangun sawerdi

jogan sapu resik linabur putih rinengga sengsem

kareben tikus-tikus lan kumawani

malbeng njemamah lumbung pari

omah anyar angganda wangi

disaba pawongan anyar katon saben rina lan wengi

pada sengkud diskusi adu landhepe argumentasi

banjur mubeng lunnguh kenduri

ngrahabi sega uduk lan kebuli

durung lawas gumanti sesawangan

tikus-tikus gelis gumrayah

ing poncot-poncot senthong ing dhuwur meja-kursi

ing njogan lan ing ngendi-endi nggegirisi

pari jro lumbung entek gusis

ing njaba ben ce ngganter saben wengi

Bojonegoro, 2009

GAMBAR-GAMBAR CUMANTHEL

cumanthel mawa pigura kencana

gambar bedhes rada lelewa

kinanthen prasapa asung tengara

(Wuluku alus bludru, sing melu tamtu rahayu)

cumanthel mawa pigura

rinengga gambar sardula

ngumbar pangancam nggegirisi

(Kareben alas nora gendra, kewan nakal kudu dikremus !)

cumantel mawa pigura kencana

gambar kancil pamer julig

sesantine memencut ati

yen piniji cekel kendhali

(Sembada kang sinedya, basuki kang kaeesthi)

cumanthel mawa pigura kencana

gambar manuk pepencokan

wulune merak ati

ocehe wola-wali

( hara……ta…….kowe…..keblithuuuuk!

gene…….. aku ….ra mathuuuk?)

gambar cumenthel gelis pathing sliwer

mbirat pangimpen endah

jugar wigar gumanti sesawangan anyar

ing njaba mendhung isih ireng nggembuleng

Babat, 2009

ADU JANGKRIK

Jerabang gelis mungkat

Pasang shotang aweh panantang

Jlitheng kebak pangancam

Kapiadreng adu karosan

Adu arep

banjur sampyuh !

banjur sampyuh !

banjur sampyuh !

solahe kili

tetela ngedab-edabi

: bumi dadi awu

Bojonegoro, 2008

TRESNA KUWI

mimi-mintuna ? dudu berai yayi

marma dheweke bebadra

tumuju titik koordinat

nyawiji

sadawane garis pan guripan

sinawang datan kawistara yayi

bisa rinasa telenging ati

adoh rinosa cedhak

cedhak rinasa adoh nyamut-nyamut

werit igupadi yayi

m oro jro jalanidhi

sela-se;anig suket teki ?

datan ing dhuwuring wiyati

Bojonegoro, 2009

SUWUNG

Dak ali-ali tansah angelela

 Gawang-gawang esem edhum rinasa

Mawar tandha tresna kang dhak ulangake nalika semana

Tinampa mawa ulat gumbira

Ing tepineng gisik smodra sinartan  

Jro dhadha ombak rasa rinunggu gita asmara

Mumbul awiyat tumeking garis cakrawala pangimpen

Mangsa gumilr gumanti arebut swasana

Citra rasa tetela among cuwilan cerita kawuri

Ngrerujit ati sinaput kabut misteri

Tanpa tangara datan prasapa sliramu

Kenter ulekan waktu

Dak eling-eling krasa njejuing

Walaka prasetyamu pancen tansah dumeleng

Ing antaranig kasetyan gonjing-oling

Marma lungamu tanpa piweling

Duk anti nadyan nglenggana

Kabeh mung pangimpen agawe kuciwa

Bojonegoro, 2009

GURIT KANGGO SUMITRA

wit gurit agung ngrembuyung manglung ing delanggung

edhum jro tlaga gupita wewayangan banyu kekinclong

kadidene pangilon ngungak ngupadi sitaresmi biru lazuardi

adi endah kuncara generasi kawuri nadyan sepi pengaji-aji

makantar angrantu tumeka bali reinkarnasi?

saiki,

godhong-godhong alun gogrog wit gurit garing

mratah paseksen tunggak-tunggak jati

tlaga asat tlatah cengkar ginawe blabar kawat udreg kesumat

bocah-bocah kanoman sugal sesumbar maciya-ciya

kumilat kumlebat panyenyes panyaruwe rebut bebener

sajuga ngungalake landhep gegaman pangawikan

sawiji sarana kaprigelan ulah kridha kakuwatan argumentasi

uleng dedreg udreg arebut balung tanpa isi

saiki,

tidah-tidha prang wacana panas kemranyas pagut dredah

sampyuh adu kumba menang kepracondhang dadi kunarpa

mumpung durung kadlarung rasa duwung gelis panglenggana

meneb rasa ening kalbu mestuti kawicaksanan

sadurunge dumugi titiwanci bebrayan asung pangadilan

cilaka yen kongsi sastra jawa nampa pangina

Sanggar PSJB 2009

SLINGKUH

sakawit walaka

banjur sinamudana

banjur paeka

banjur lamis

ana padhang pilih peteng

akeh dalan liwat grumbul

mlimpir-mlimpir sesingit

mlumpat pager pranatan

gelis kejodheran

Bojonegoro, 2009

AMPUTASI

omah gedhong magrong-magrong

isih dhuwur kekarepan

mobil anyar kinclong-kinclong

kalah kambi playune ati

bojo ayu moblong-moblong

nora kuwawa meper galak birahi

kupiya ngawekani

datan tangan sikil diamputasi

jer kekarepan kang luwih mbebayani

Bojonegoro, 2009

SEDYA

langkap wus kadu pinenthang

ngarah mungsuh kang wus gamblang kawilang

yagene kongsi samar

apa dheweke isih kanca rowang?

palu vonis wis cumawis

kursi kapradatan wus tinata

yagene tidha-tidha?

apa duratmaka sesingidan suwalike tangan prakosa?

ancas tujuwan wus terwaca

tamtu bebrayan kapiadreng sabela

yagene isih mandheg mangu?

pangancam kudu ginawe jamu

gendera perang wus dikerek dhuwur

janji-janji wajib sinartan bukti

yagene ndadak sanggrunggi

korupsi genah mungsuh angka siji !

galei dibesmi !

Bojonegoro, 2009

KATRESNANMU BIYUNG

tresnamu godhong-godhong nrembuyung

sadawane delanggung

kembang-kembang arum amrik angambar

eden-eden ngaurip sinawang linuwih binger

tresnamu jerone jalanidi

biru malembak

lila nampa ilining kali sungapan panggresah

nampa sakabehing sangkrah

tersnamu lintang-lintang datan kawilang

sumunar rinengga ing biru langit lazuardi

rinasa padhang jro pepeteng

bebadra datan koncatan ancas tujuwan

tresnamu tresnane Dewi Kunti

setya rina pantaraning ratri

tutwuri anjampangi sinaertan donga pamuji

mestuti dadi tepa palupi

Bojonegoro, 2009

DHEWEKE NGAKU PAHLAWAN

dhewe ngaku pahlawan

mbiyen dadi pangewan-ewan kadidene bebanten tatanan

omah plataran paripaksa digusur dadi dalan

sawah pategalan dadi bancaan paekan reregan

ngaurip rinasa kesimbar kesandhung

lan swara tangis pathing bilulung

dheweke ngaku pahlawan

ndhisik ajeg mlebu-metu wengis pakunjaran

arikala nyawarakake lagu kamardhikan

adreng ngepelake tangan

aweh panyaruwe kaculikan kemunafikan

dheweke ngaku pahlawan

karana wus kuwawa nginger kahanan

gelis cekel kuwawa adol kaskayaning Negara

duratmaka sinamudana

lungguh sila arebut sega bancaan

ketungkul guyu gegojogen tan maelu tangis sesambat

abote urip padinan kalindes playune reregan

dheweke ngaku pahlawan

jalaran wus kongang ngowahi tatanan

slaras kambi ancase sowang-sowang

arebut swasana lan kalodhangan

manjelma dadi macan wengis ngelak getih balambangan

kadang lan kanca rowang gelis dadi memangsan

Bojonegoro, 2009

Pawarta Saka Pangumbaran

Apuranen aku,

wus sewindu lawase nuruti ati kumbara

ninggal sliramu kanthi ati tatu

jumangkah luru margining kamulyan

apuranen aku

lunga ninggal sawah pategalan

jer wus ora kuwawa dadi sumber panguripan

aku uga wus krungu saka kadohan

ana rame-rame owah-owahan kahanan

reregan rabuk lan obat uber-uberan

nora murwat kambi ajining kringet dleweran

apuranen aku,

wus sewindu ora aweh kabar

tartamtu bocah-bocah angrantu kanthi kuciwa

layangmu pungkasan wus dak tampa

ngenani bocah-bocah wus ninggal bangku sekolah

temen apuranen aku,

ora bisa bali mulih ngadesa

nalika ibu seda

aku kesrimpung ing kantor imigrasi

ora ngerti iki laku bebadra apa laku pidana

iki pangumbaran apa sajjroning bui?

Bojonegoro, 2009