CERKA "PANGIMING-IMING" NONO WARNONO

PANGIMING-IMING

Dening :  Nono Warnono

 

Jeneng sing disandhang mengku pralampita endah. Basa arab, Zuhrotun Nisa. Nduweni teges wanita kembang. Wong tuwane biyen duwe gegadhangan dheweke bisa dadi wanita kang arum. Kaya kembang kang wangi angambar.

Wiwit cilik wis katon lantip. Lungguh bangku SD ajeg rangking siji ing kelas. Dadi siswa sing digemateni guru. Ditresnani sapepadha murid. Bapake asring paring hadiah kanggo prestasine. Pengaji aji sing disengguh kadidene motivasi mligi.

Kanggo njembarake pesrawungan, ngancik tataran SMP nganti SMA dheweke sekolah menyang kutha. Prestasi manjila.Wong tuwane tansaya mongkog atine, banjur dielokake tabungan beasiswa. Kanggo nyengkuyung pendidikan amrih gangsar lumakune.

Kabeh mau ora mokal, jer bapake, Alfan Jazuli, wis lawas nyambut gawe ing salah siji bank pemerintah daerah Lamongan. Wis banget faham babagan jasa keuangan. Cekel abang ijone kredit kanggo para pengusaha ing maneka bidang.

Gilir gumantine wektu nyakramanghilingan. Nisa beda slagane. Prestasine mudhun. Asring gumbul karo kanca-kancane kluyuran rame-rame.

"Nisa, bapak ibu wis nyedhiani bandha kanggo pendidikanmu," semantane Alfan ing sawiji dina.

"Inggih,Pak.Kula mangertos," tumanduke kanthi swara alon.

"Bapak krungu kabar lamat-lamat, kurang sedhep yen dirungu. Jajal critaa, apa bener rumor mau?" Alfan nyarawidekake.

"Bab napa nggih bapak?" ujare Nisa api-api ora paham.

"Ngenani srawungmu kuwi lho ndhuk?!" pamunggele Fauziah ibune.

"Kula medal sareng kanca-kanca yen wonten kegiatan sekolah kok,Bu. Menapa lepatipun?" wangsulan semu nyaruwe.

"Ngumpul kanca ngrampungake tugas sekolah kuwi apik. Ning aja njur rame-rame nganti tengah wengi,"

Nisa ora wangsulan. Mung pilih meneng embuh apa sing dibatin. Nganti biyunge nyambung ukara maneh..

"Bapak ibu wis nyiapake kabeh keperluan pendidikanmu. Malah taun ngarep rencana arep ngejak kowe plesir menyang Singapura" pangiming-iming marang anak ontang anting.

Wiwit kedadeyan kasubut, Nisa idhep-idhep nglenggana marang tumindake. Taberi sinau. Ngeloni kegiatan-kegiatan positif ing sekolahan. Nganti lulus kanthi prestasi cukup manjila.

"Miliha perguruan tinggi sing bisa nambah kawruhmu ing babagan manajemen perusahaan," prentah wong tuwane sarampunge lulus SMA.

"Kula estunipun kepengin terjun ing bidang pertanian,bapak. Nglajengaken pakaryanipun simbah," ature Nisa ngenyang.

"Aja ndhuk, bapak wae suthik nerusake pakaryane simbahmu. Jaman digital usaha ing bidang petanian kuwi kurang prospektif. Pupuk sering langka. Obat-obatan larang. Tenaga kerja angel golek-golekane. Isih ketambahan saben panen rega asil tetanen anjlog"

"Nanging sakmenika kathah para petani milenial ingkang sukses,bapak?"

Nisa adreng anggone kepengin ambyur ing bidang pertanian. Nerusake ngemonah tegal sawah simbahe sing diwaris bapake.

"Aja ndhuk! Bapak kepengin masa depanmu luwih apik ketimbang jamane simbah lan bapak-ibu. Aja njegur ing bidang pertanian. Ngemonah tegal sawah kuwi akeh susahe tinimbang bungahe. Jaman wis ngalami owah-owahan gedhe." mojar akeh-akeh Alfan ngadhang kekarepan anak semata wayang.

Nisa ora kuwawa wangsulan maneh. Pilih meneng disambi ngempet tangise sing meh ambrol. Gelis mlayu, mlebu kamar. Meneb lawang. Ngebrukake awak ing peturon kambi ungkeb-ungkeb bantal.

Biyunge sing ora tega gelis jumangkah nututi. Mlebu kamar alon kanthi ngati-ati. Lungguh peturon karo ngelus alon anak sing ditresnani.

"Nis, bapak ibu iki ora duwe tujuan njlomprongake anak. Apa sing dikarepake bapak mau ana benere. Kabeh kanggo masa depanmu sing luwih apik. Slaras karo jaman kelakone.,"pitutur alus

Tangise anak ontang-anting leren. Gelis ngrangkul biyunge.

Genahe, Nisa banjur gelem kuliah slaras kekarepane wong tuwa sekawit. Mlebu salah siji perguruan tinggi terkenal ing Surabaya. Senadyan dheweke sejatine duwe krenteg kuliah ing Bandung apa Jakarta.Tekan semester lima prestasine apik. Ngelmu manajemen dikuwasani. Teori bisnis keuangan wis  dipahami.

Dumadakan dhdhane kaya disamber bledhek. Ora perkara kuliah. Nanging jodho. Nedya dipacangake kambi wong lanang jeneng Budiono. Putrane pegawe bank aran Ahmad Kholik. Kanca nunggal profesi karo bapake. Mung beda bank papan nyambut gawe.

Dheweke durung nyaguhi. Durung aweh wangsulan. Atine ora trima, kuliah durung rampung kok wis digolekake pacangan. Apa maneh kuwi dudu pilihane dhewe. Mung nuruti ambisi wong tuwa sing duwe karep ngana-ngene. Kanthi pangiming-iming, dijamin urip mulya. Jer calone saka keluarga mapan kanthi jabatan cukup kinurmat.

Nekat matur biyunge ing sawiji wengi. Didukani piye wae nedya ditampa. Sing baku ruwet pikirane bisa diudhari.

"Bu, menapa kula kedah nuruti sedaya kersa kersanipun bapak?" panglocitane Nisa kamisesegen.

"Bab jodho, sejatine bapak ibu ora meksa. Mung menehi gambaran mbokmenawa kowe bisa dadi tetimbanganmu,ndhuk?" clathu biyunge kanthi sareh.

"Nanging dhawuhipun bapak kados meksa. Kedah kula lampahi. Menapa kula mboten kepareng gadhah pilihan piyambak?" pitakon ing antaraning pegat-pegat tangis.

"Tak pikir pilihane bapak kae ya ora luput ta,ndhuk?. Kabeh ngemu tujuan becik. Endi ta ana wong tuwa sing kepengin nyengsarakake anak?"

Kabeh tembung mung dibatin lan diempet jroning dhadha. Arep mbantah, atine ora kuwawa. Jer wiwit cilik digladhi urip jroning keluarga tradhisi jawa nengenaken subasita.

Kabeh seseging dhadha mung digembol. Ora curhat marang sapa-sapa. Disimpen, disangga dhewe. Ora kepengin wong liya ngerti. Dheweke duwe dudutan yeng wadul masalah marang liyan durung kepara mesthi antuk solusi. Salah-salah malah dadi rerasan ngakeh ora tumanja.

Owah-owahan ngadhepi kanyatan mau mung nate diblakakake arang Lingga Prasetya kanca kuliah sing mambu ati karo dheweke. Wiwit ketarik lelorone. Kamangka padatan mung disengguh kanca lumrah. Sakiki ora mung trima kepethuk ing kelas perkuliahan, nanging ajeg kangsen sanjabane kampus kanggo sawiji keperluan.

Meneng-meneng Nisa gawe ada-ada investasi. Kanthi pawitan tabungan saka wong tuwa. Investasi wujud foreign exchane, cryptocurency, lan saham. Pangiming-iming profit  gedhe.

Dheweke dhapuk owner dibantu Lingga. Main treding. Ngrekrut bocah sapantaran minangka reseller kanggo golek member. Dhuwit saka member disetor dheweke lumantar reseller. Menehi insentif lan komisi saben rekrutan member anyar.

Kegiatan bisnis kang disambi kuliah sukses. Uripe mubra mubru. Tumpakan mobil weton anyar rega larang. Tuku omah rega  sakmilyar punju.. Wong tuwane kaget mrangguli kanyatan.

"Nisa, saka ngendi olehmu urip mubra-mubru? Apa melu bisnis investasi bodong? Bapak ibu melu kuwatir!" Alfian nlesih.

"Kula namung bisnis alit-alitan bapak. Kados kersanipun bapak-ibu rumiyin. Kula kedah nyemplung donyaning bisnis. Mboten kepareng njegur ing bidang pertanian," wangsulane Nisa kanthi swara abot.

"Ning kok cepet temen ngolehake keuntungan? Bisa gelis tuku ika-iki,"

"Menika bisnis sesarengan kanca-kanca kuliah sajurusan. Investasi alit-alitan.Nggabung jaringan pengusaha milenial," ujare kanthi pasemon yakin.

Nampa wangsulan mau Alfian ora takon maneh. Nadyan atine samar, mung dibatin. Nganti ing sawiji kalodhangan Alfian krungu rame-rame ing jagat medsos. Banjur muncul  pawarta surat kabar. Isi berita ora ngepenakake.Malah wus ana sing ngancam lan nganakake demonstrasi.

Geger ngenani investasi bodong pranyata bener. Dudu berita hoks. Ora suwe kabeh aset kendaraan, tanah,lan  perumahan disita polisi. Klebu dhuwit ing rekening bank. Polisi mburu pawongan inisial ZN lan LP owner investasi bodong. Alfian tansaya goreh atine. Gemeter sakojur awake.Samar yen inisial ZN kuwi Zuhrotun Nisa, anake. Mangu-mangu. Ora mungkin anake  investasi bodong kadidene tindak penipuan.

Ndadak polisi nekani omahe. Nggoleki Nisa minangka pelaku penipuan sing mlayu ndhelik embuh menyang ngendi.Lan ora suwe omahe digrudug puluhan member lan reseller sing wis setor dhuwit. Alfian lan bojone ora bisa kumecap apa-apa. Blangkemen. Kamiweden. Ngadhepi wong-wong sing padha teka. Nywarakake maneka tuntutan, dhuwite kudu enggal bali. Ana sing bringas ngancam kanthi tindak kekerasan.

Saka kono Alfian sadhar yen Nisa anake nindakake investasi bodong. Ngapusi wong-wong kanthi janji profit mencut ati. Mony game skema Ponzi. Mung muterake dhuwit profit saka member anyar marang anggota lawas. Banjur macet,dadi urusan polisi.

Ora gantalan suwe Nisa lan Lingga dirangket polisi. Pelarian pindhah panggonan saben dinane. Singidan kanca kuliah siji, menyang kanca liyane. Ngono sateruse. Nganti polisi nggrebeg omah kancane kuliah ing Bojonegoro.

Krungu anak ontang antinge ditangkep lan diinterogasi polisi, Alfian gegancangan nyusul. Tekan kantor polisi adu arep karo Nisa sing diborgol tangane. Alfian ora bisa kumecap. Kamitenggengen nyawang bocah wadon ing ngarepe. Anak semata wayang. Banjur sirahe krasa klemun-klemun. Penyawange ora cetha. Ndadak gumebrug tiba semaput. Rame dadi layatan.

Cuthel